《讀者請教》長篇
原post後續：
https://m.facebook.com/story.php?story_fbid=645738256032920&id=156592644947486
我同c6終於都決定今年補辦擺酒正式註冊結婚本應結婚係一件開心嘅事點知去到佢老母度成件事變成....🤧話說男家長輩準備金器比一對新人其實係一種祝福但呢個傳統嘅禮節俾佢老母講成為買金器俾我佢條氣好唔順超🙏🏻因為自從舊年初三事件（冇睇過嘅朋友可以睇返舊post）之後我一直都冇再見過呢位極品長老，所以佢就覺得咁樣係好唔尊重佢，又話我哋結婚點解我自己唔WhatsApp通知佢💁🏻♀️總之點講都係我嘅錯啦⋯⋯
至於佢阿媽係一個咩人舊post都有講。喺度略略再講一次佢阿媽好後生就生左c6, c6既阿爸死得早一句年少無知就大晒將個仔一直置之不理，除咗講錢之外就係錢同錢，總之有錢就萬事足，一啲正常父母應該對仔女去做嘅嘢佢從來冇做過仲要覺得所有嘢都係理所當然！總之大聲鬧人佢就是對的！
再講返結婚呢件事呢位極品長老話唔願意買金器我就同c6講冇所謂，其實我要嘅只係真心而唔係真金，最令人激氣嘅事係話說呢位極品長老本身眾叛親離冇晒親人，所以可以坐主家席嘅親人幾乎係零所以佢只可以叫佢身邊一啲親朋好友（成班講是講非嘅八婆）一齊坐，其中有幾位朋友嘅親人剛剛過咗身點樣計去到我哋婚禮嘅時候都只係剛剛或者甚至未過一百日。
正常有道德觀念嘅人都知道紅事白事相沖都係唔好，更何況做兄弟姊妹當中有人帶住個肚而女家嗰邊亦有好多咁上下年紀嘅長輩喺度，點知呢位極品長老唔識體諒之餘仲要講句：百無禁忌啦有乜所謂根本就唔會理呢啲嘢！
我c6答佢點可能淨係諗自己嗰邊有咁多親戚朋友都會去點可以咁自私唔諗吓正常人都會介意，之後佢老母已經唔高興，再跟住就話叫我哋婚禮改期去就佢其中一個朋友因為咁岩撞正同一日佢呢位朋友屋企都有喜事，所以唔可以出席呢邊嘅婚禮一齊坐主家席而要求我哋去改期，我c6答佢冇可能！
而最後最大嘅導火線就係呢位極品長老最後講咗一句：聽完嗰班三姑六婆八婆師奶嘅朋友講完之後話個仔個老婆都唔尊重佢，洗咩買金器最多咪買多條金鏈比個仔就得，分分鐘出年如果離婚要蝕埋比女家💁🏻♀️
我c6聽完終於都忍唔住反駁佢自己阿媽，話出面啲人唔知內情嘅講三講四加鹽加醋，但問題係作為一個長輩呢啲說話應該講嗎？最後叫咗呢位極品長老唔需要再出席我哋嘅婚禮，就當冇生過呢個仔（我知c6可能都係一時意氣所以咁講）因為極品長老成日當正自己係公主覺得全世界嘅人就要遷就佢，得唯一一個仔結婚佢唔祝福都算仲要黎搞破壞！
我今次冇再好似上次拜年事件咁樣啞忍唔出聲，我成晚冇瞓打咗一篇成幾百字嘅長文俾咗呢位極品長老睇，我希望佢係可以明白我想講嘅重點係，既然咁多年都冇養育個仔，難得個仔嘅大日子全世界個個都嚟祝福我哋嘅時候點解身為自己媽媽要咁樣對待？點解女家嘅屋企人可以用愛去包容佢個仔，事事唔計較只希望男方可以對自己個囡好就係最大嘅安慰，但係佢老母就因為買金嘅事喺度斤斤計較？
我以為極品睇完之後會深有愧疚點知三個字「嘥鳩氣」，正當我以為成件事已經圓滿解決佢阿媽唔會出席我哋嘅婚禮所有事情其實變得簡單同輕鬆之際，我點都估唔到所有說話都已經講到出面已經半攤牌。但呢個極品長老又喺度詐傻扮懵叫我哋有時間一齊出去金舖睇金器💁🏻♀️其實機會我哋一次又一次俾咗而一次又一次咁去包容同容忍，我真係唔想到婚禮嗰日會有任何唔開心嘅事發生，我真係唔識點樣做請問有冇人可以教吓我🙏🏻（利申：識咗c6甘多年以來我從來都冇同過呢位極品長老嘈過交或者頂撞過半句，我一直都係處於有委屈自己忍唔出聲，因為唔想c6難做)但是都如今關乎到雙方咁多嘅親朋戚有我真係唔想因為一個咁樣嘅極品長老而破壞咗成件美好既事🤧）
請大家幫忙俾意見，謝謝🙏
Search